Það sem maður leggur á sig fyrir skeinipappírinn...

Eins og fram hefur komið hér á síðunni fór ég í verslunarleiðangur í gær þar sem ég þræddi helstu búðir sem Íslendingar þræða um helgar þ.e. Elko, BT, Kringluna, IKEA, Rúmfatalagerinn, Blómaval og síðan endaði ég á Bonna í Holtagörðunum.

Í ljósi þess að kennaralaunin gefa meira af sér en von var á fannst mér alveg tilefni til þess að við Kambsvegsbúar færum að hreinsa á okkur neðri endann með aðeins betri pappír en undanfarið og splæsti í Andrex rúllur, nota bene 9 rúllur á 639 kr. Tek fram að það er góðæri í gangi á Kambsveginum í augnablikinu! Það fór nú ekki betur en svo að ég gleymdi pakkningunni á kassanum og kom því heim með engan pappír. Ég hugsaði með mér nei fjandinn hafi það ég verð að gera mér ferð þarna á morgun til að sækja helv... pappírinn enda búin að eyða alltof mikið í hann. Og það gerði ég, var að koma heim úr Bonna, náði rétt fyrir lokun og jú það passaði það hafði gleymst pakkning af Andrex á kassanum hjá Ragnheiði nokkurri og ég mátti bara skokka inn í búð og ná mér í nýja. Ég hélt af stað inn í búðina glöð í bragði með að málið væri svona auðleyst en viti menn þegar ég kom að hillunni þar sem Andrex átti að vera greip ég í tómt...allt búið!

Mér var því tjáð af öðrum starfsmanni að þær á kassanum yrðu bara að endurgreiða mér pappírinn og ekki nennti ég nú að fara að standa í 10 metra langri röð fyrir það þannig að ég spurði hvort ég mætti ekki bara velja mér aðra tegund og jú jú það var í lagi.

Það besta í stöðunni var að velja þriggja laga mjúkan Bonnapappír, 9 rúllur í pakka en auðvitað enginn Andrex. Ég gekk því nokkuð þungum skrefum út úr búðinni enda búin að tapa rúmum 240 kr. (því ég nennti ekki að bíða í röð til að fá mismuninn endurgreiddan) og leggja á mig ferð í búð út af skeinipappír...

Það verður langt í það að boðið verði upp á Andrex á Kambsveginum, það er þá ekki nema við einhver hátíðistilefni!

Við hjúin tókum smá kaupa kaupa kaupa trylling í dag..

svona eins og okkur einum er lagið. Það var auðvitað bráðnauðsynlegt þar sem kennaralaunin reyndust vera töluvert hærri en við var að búast og svo var Andri auðvitað að fá svo frábært verkefni þar sem hann fær borgað fyrir að lesa! Takk fyrir ekki svo slæmt fyrir mann sem kemst ekki út í bíl án þess að vera með bók við hönd.

Allaveganna...við keyptum okkur nettar græjur í stofuna því við erum orðin ansi þreytt á að hlusta á allt í dvd með kveikt á sjónvarpinu og sjálflýsandi bláan skjá, auðvitað þurftum við einhverja jack (bauer, ég veit ég er smá fyndin) snúru með til að geta tengt ipodinn. Síðan héldum við í Kringluna þar sem ég fann mér eina fína peysu og einn góðan síðan bol, skrýtið hvað ég á bara voða stutta og þrönga boli! Ég þarf nauðsynlega að fara að leggja pening inn á vinkonur mínar í H&M landi og biðja þær að senda mér fallega boli í pósti:)

Síðan þegar allt safnaðist saman var komin góð hrúga af dóti, diskur með Mahler, Erikur í stóra pottinn út á tröppum, þurrkað blóm, salatsett, þvottapokar, sokkar, ilmkerti (nokkrar týpur), einn rammi og svo auðvitað nóg af mat...svona er þetta bara þegar maður missir sig í kaupa kaupa!

Lottó og Ruth komu svo í mat til okkar og ég skellti í amerískar pönnslur í eftirrétt, með sírópi og öllu tilheyrandi!

Til að toppa daginn þá er uppþvottavélin komin í gagnið aftur og starfar nú betur en nokkru sinni fyrr.

Ansi góður laugardagur að baki en á morgun tekur við smá vinna, það fylgir þegar maður getur leyft sér að fara heim klukkan tvö á föstudögum.

Þar til næst...ciaoooo

Ég held að ég hafi verið að taka mjög svo skynsamlega ákvörðun áðan...

Ég ætla að sleppa því að fara á barnabókmenntaráðstefnuna í Stokkhólmi sem mér var boðið á núna 21. september...

Það er nefnilega ekkert víst að "litli kallinn í mallanum" myndi vera ánægður með það og að sjálfsögðu tekur maður enga sénsa þegar svona mikið liggur við.

Jæja ég er fegin að vera búin að ákveða þetta og varpa "sprengju" númer 2 hérna á vinnustaðnum og það var auðvitað ekkert mál frekar en hin fyrri:) Það fer bara einhver annar núna og skólastjórinn sannfærði mig um að ég fengi annað tækifæri seinna til að fara á slíka ráðstefnu.

Ég get farið glöð inn í helgina og hafið það gott um helgina kæru vinir:)

Fimmtudagur til ferlega mikillar þreytu...

þið getið treyst á góða kríu hjá kennslukonunni eftir hálf þrjú!

Zzzzzzzzzzzzzzz...

Oldie Goldie myndir sem amma Malla var að fá úr framköllun...

ca. 5-6 árum eftir myndatöku!

Mágkona mín spengileg í sparikjólnum...
Nýjabrumið varla farið af...lítið hefur maður nú breyst á 6-7 árum!
Ótrúlegt þegar þau voru með þessa greiðslu..
Og þeir, Hjallinn hefur lítið breyst!

Minningar, minningar...

Ég vaknaði upp með andfælum í nótt..

Mig var að dreyma einhverja ógeðslega kónguló og þegar ég fór á fætur í morgun var ég viss um að þetta væri fyrir einhverju hræðilegu en eftir að hafa farið á stúfana og kannað hvað það merkir að dreyma kónguló þá kom í ljós að það boðar mikla hamingju að dreyma kóngulær..

Við skulum vona að það rætist:)

Laugardagur til lukku...

Ég er að fara í brúðkaup og skírn í dag og ég hlakka óheyrilega mikið til. Ekki bara vegna þess að ég er að deyja úr spenningi hvort drengurinn fær nafnið Andri Björn eða Fannnar Björn heldur líka út af því að ég hlakka svo til að sjá brúðina og gumann í sínu fínasta pússi. Hvað er betra en að fá smá tár í augun og upplifa rómantíkina sem á sér stað í litlu brúðkaupi.

Ég hef aldrei verið hrifin af stórum brúðkaupum eða bara brúðkaupum yfir höfuð þ.e. svona eins og þau birtast í Brúðkaupsþættinum JÁ, með öllum þessum hefðbundnu hundleiðinlegu leikjum sem hafa verið leiknir alltof lengi.

Besta brúðkaup sem ég hef farið í var hjá foreldrum mínum árið 2000, þá ákváðu þau eftir 18 ára samvistir að láta gefa sig saman og sögðu mér og systrum mínum frá því á föstudegi og athöfnin var á laugardegi, afmælisdegi föður míns. Í kirkjunni voru einungis þau, við systurnar, presturinn og nokkrir flautuleikarar. Þetta var ákaflega falleg stund:) Síðan var búið að bjóða nánustu ættingjum í afmælisboð á Grunninn og þegar þeir mættu var mamma auðvitað í látlausum fallegum hvítum kjól þannig að það fór ekki á milli mála hvað var í gangi. Þetta var brúðkaup í lagi.

Ég hef sömu væntingar til dagsins í dag, ég held að þetta verði svona lítil falleg athöfn þar sem engin uppgerð á sér stað. Oh ég get ekki beðið...

En að öðrum málum. Það er ekki svo alslæmt að vera kennari bæði auðvitað út af því að þetta er draumastarfið mitt og mér finnst ótrúlega gaman í vinnunni og síðan eru launin bara miklu miklu hærri en ég átti von á. Nú hugsa einhverjir tala við hana eftir 3 mánuði en ég gæti bara ekki verið sáttari, dugar allaveganna mér og mínum en auðvitað gæti maður orðið þannig að þegar maður sér þetta hækka vill maður alltaf meira og meira. En allaveganna þá er alltaf að bætast einhverjar summur ofan á það sem ég hélt að væri heildartalan. Eins og já svo færðu auðvitað auka hérna fyrir þetta og hérna bætist ofan fyrir þetta o.s.frv., held að viðbótin hlaupi á einhverju tugum án gríns:)

Jæja nú blöskrar örugglega einhverjum kennurum en ég læt það ekki á mig fá, svo ég minnist nú ekki á vetrarfríin, jólafríin, páskafríin og sumarfríiin...þið sem getið ekki verið sammála...fáið ykkur bara annað starf, bara hundleiðinlegra...tek samt fram að mér finnst að laun almennt sem snúa að umönnunarstörfum eigi að vera miklu miklu hærri. Kennarar halda bara oft að þeir séu þeir einu sem standa höllum fæti.

Jæja kannski aðeins of mikið á jákvæðu nótunum í dag en maður kemst nú ekki langt nema vera það svona svona endrum og sinnum!

Nytsemi uppþvottavélarinnar eða uppvöskunarvélarinnar eins og amma segir...

Þegar ungt og athafnasamt fólk er búið að venjast þægindum þess að hafa uppþvottavél er erfitt að snúa til baka í uppvaskið, sem var btw ekki svo alslæmt fyrir fyrstu kynni af uppþvottavél. Við töldum okkur nefnilega ekki þurfa á þessari vél að halda þegar við fluttum inn!

Í fyrsta lagi venur fólk sem á uppþvottavél sig á að nota eins mörg glös og það mögulega getur yfir daginn, það skiptir hvort sem er ekki máli, því þau fara öll í þvott þegar kvölda tekur.

Í öðru lagi finnst eigendum uppþvottavéla lítið mál að setja alls kyns góðgæti á fullt af diskum og í skálar og guð má vita hvað eigendum uppþvottavéla dettur í hug...

Fyrir rúmri viku ákvað okkar yndislega vél sem er svipuð og sú á myndinni fyrir ofan (afar hentug fyrir búskap tveggja) að hætta að taka inn á sig vatn, hún vildi bara freyða sápu út um allt og lét illum látum.

AFO fór síðan á síðasta þriðjudag með vélina í viðgerð og það gæti tekið sinn tíma því svona elskur virðast bila trekk í trekk enda í sífelldri notkun.

Húsráðendur á Kambsveginum eru orðnir svo þreyttir á að skiptast á þessu uppvaski og geta ómögulega vanið sig á að nota sama glasið yfir daginn (og það á við um báða einstaklingana) þannig að fyrr í dag var brugðið á það ráð að nota eingöngu plastglös og pappadiska þar til ástkæra vélin kemur aftur:)

Og núna er líka alltof mikið borðpláss þar sem vélin góða stóð...

En hún var einmitt á svipuðum stað og vélin í þessu eldhúsi enda nánast eins eldhús og á Kambó:)

Passið upp á þessar elskur...

-Enginn veit hvað átt hefur fyrr en misst hefur-

Fyrsta kennslustundin mín sem stærðfræðikennari hefst eftir rúman klukkutíma...

og ég er ekki frá því að það fari smá fiðringur um mig, fyrsta viðfangsefnið er hringir og hyrningar og mikil vinna með hringfara. Hvaða unglingur hefur ekki gaman af nákvæmnisvinnu með hringfara?? Nei maður spyr sig...

Einhver góð tips svona rétt fyrir mót?

later speiter..

Ég fór í innflutningspartý með þessum tveimur í gær...

og svo auðvitað miðbæjarmýslunni...
"hún" var gjegje hress að vanda
fyrr um daginn heimsótti ég þessa litlu snót
hún var sko agalega ánægð að hitta skáfrænku sína eftir langan tíma:)
fékk sér meira að segja vöfflu í tilefni dagsins!
og fór létt með að bræða mann upp úr skónum:)

Vona að móðirin sætti sig við nokkrar myndir á netinu! Stóðst bara ekki mátið að monta mig aðeins af uppáhalds skáfrænku minni...

Þetta var góð helgi og nú hefst vinnuvika með mánudagsnáttúrufræði. Sú hugmynd kom upp að ég yrði alltaf í hvítum tilraunaslopp á mánudögum því þá kenni ég bara náttúrufræði, ekki svo afleit hugmynd verð ég að segja!

Góða nótt litlu lömb!

Ég var að vinna í dag...

á sunnudegi, það vantar ekki drifkraftinn og metnaðinn sei sei sei, gott að byrja þetta af krafti á meðan maður nennir.

Ég þreif allt hátt og lágt á Kambsveginum í gær og það var svo sannarlega kominn tími á það obbbobbbobb

Núna er ég hjá ömmu gömlu að kenna henni á Skype, haldið að það sé dugnaður í henni?

Jæja smá innskot...

Og ég sem hélt að ég væri að fara að varpa einhverri kjarnorkusprengju...

kom á daginn að þetta var ekki einu sinni handsprengja, sprengjulíkingin var því afleit hjá mér!

Síðan fékk ég svo skemmtilegt bréf í dag, af hverju sendum við ekki meiri löturpóst, það er svo gaman að fá góð bréf. Sérstaklega þegar þau koma hvaðan af úr heiminum.

Það er alveg skelfileg tilfinning að fimm vinkonur manns verði kannski staddar erlendis í vetur:

Álfrún, Regína og Sóley í Köben, Magga í Berlín og svo kannski Auður Agla í Austurríki. Stelpur við bara verðum að vera duglegar að vera í sambandi, ég talaði t.d. við Álfrúnu í klukkutíma á skype í gær, það gerir sko alveg gæfumuninn. Ég talaði reyndar við Ingibjörgu í klukkutíma líka, Sóley í svona 15 mín., Sigríði í 20 mín. og mommsuna mína nokkrum sinnum yfir daginn...í hefðbundinn síma.

Já ég tala kannski frekar mikið í símann humm..

Jæja ég er farin í heilsubótargöngu og sundferð með Sóley og síðan ætlum við að snæða eitthvað uppbyggilegt.

Bestu,
Bellan

-Illu er best aflokið-

Jæja maurarnir mættu vel í dag og mér leist bara vel á þá...

tók síðan minn alkunna nafnatrylling og lærði nöfnin á nó tæm enda með límheila með meiru!

Ég mun síðan taka alla bekkina í hópefli og verð því örugglega orðin ansi hópefld í lok viku. Maturinn í vinnunni er guðdómlegur og Skúli kokkur Hansen ber fram hvern meistararéttinn á fætur öðrum, ég veit ekki hvernig ég enda eiginlega í lok vetrar. Var að skrá mig í mat í dag og ég hakaði við hvern daginn á eftir öðrum enda alltaf eitthvað nýtt og gómsætt í boði.

Tók síðan meðvitundarleysið á þetta það sem eftir lifði dags en er aðeins að koma mér aftur í skipulagsgírinn núna enda þýðir ekkert að slaka á svona þegar allt er að komast í gang.

Ég set líklega seríu 3 í glansmyndunum inn á morgun en eins og glöggir lesendur hafa væntanlega tekið þá er Álfrún búin að rústa þessari keppni:)

Þar til síðar kæru vinir

-Blindur er bóklaus maður-

Taka 2 í glansmyndunum...

Og getið nú...

-Að kveldi skal dag lofa-

Eitthvað þykja mér dræmar undirtektir í getrauninni góðu...

Glansmyndir fortíðarinnar standa þó algjörlega fyrir sínu, næstu fjórar myndir koma inn á morgun!

En á morgun er að ég held einn stærsti dagur lífs míns, það bókstaflega raðast allt á daginn á morgun og stendur og fellur allt með deginum á morgun...fjúff barasta.

Ég ætla einmitt að bregða mér snemma í bælið til að vera viðbúin öllu saman, tilbúin í átökin.

-Vinna gerir væran svefn-

1

Fyrsta serían í "glansmyndum fortíðarinnar"...

Þessar myndir fundust í geymslu á nýja vinnustaðnum mínum og nú reynir á ykkur góðir lesendur...hver getur nefnt nöfn allra?

Vegleg verðlaun í boði:)

Áðan söng ég Working in a coma í stað girlfriend in a coma (Morrisey)...Andri spurði líka hvort það væri svona ógeðslega gaman í vinnunni...

Er að fara í mat til Hjalla, hlakka til, það er svo gaman í matarboðum:)

Ég elska nýja starfið mitt, algjör draumur...

Þið sem þekkið mig vel vitið örugglega hvað mér finnst gaman að sitja í stofunni minni, við kennaraborðið mitt og skipuleggja og plana og gera áætlanir og skipuleggja meira og skrá niður og ljósrita og búa til verkefni og raða í litlu skúffurnar á kennaraborðinu...that´s me!

Í dag gleymdi ég mér alveg við tölvuna og fattaði allt í einu að ég var orðin ein í byggingunni og klukkan langt gengin í fimm og allir farnir...reynsluboltarnir eru náttúrulega ekki alveg að sitja svona við en allaveganna þá verð ég umsjónarkennari í 8. bekk og kenni þeim íslensku og stærðfræði og síðast en ekki síst verð ég að sjá um náttúrufræðikennslu í 7. bekk ójá ég verð mætt í tilraunastofuna að malla eitthvað saman...frumeindir hvað!

Jæja meira um þetta síðar...

En Magga ég gleymdi að segja þér að ég fór að þínum ráðum og hlustaði á Gangsta´s Paradise þegar ég labbaði í vinnuna í gær enda rifjuðust upp góð trikk frá Michelle Pfeiffer:)

Litla kennarastelpan

Klofahátíðin fór vel fram í ár eins og við mátti búast...

Þetta árið gekk hún undir nafninu GEÐKLOFI 2006 og hér á eftir fylgja nokkrar myndir sem sýna glögglega geðklofann sem var í gangi:)

Menn voru svona mishressir í fótboltanum...ælt og skorað!

Bankastarfsmaðurinn stóð sig með ágætum í markinu þrátt fyrir rifinn liðþófa og þónokkrar hrákur nóttina á undan!

Þrjár úr Tungunum

Ógeðslega flott innkast...

Gulir og glaðir

Má ekki bjóða þér einn chilliborgara?

Þeir ólíku einstaklingar sem mynduðu hina geðklofnu heild:)

Erfitt hefur verið að útnefna hver hlaut Gin og Klofaveikina þetta árið en menn eins og Logo, Hlérkan og Tulli koma sterklega til greina...Lottó var einkar slakur þessa helgina enda kominn í stöðuna 2-1 gegn Mappanum sem lét ekki sjá sig:)

Ýmsar hugmyndir hafa borist varðandi yfirskrift hátíðarinnar árið 2007 en þar má nefna Klofinn í tvennt og Klofinn í herðar niður. Aðrar æskilegar hugmyndir eru vel þegnar...

Takk fyrir frábæra helgi...

Sjaldséðir hvítir...

Jæja góðir hálsar fer ekki að verða kominn tími á að endurvekja þessa blessuðu síðu svona í tilefni þess að ég er búin að sækja um leyfisbréf til þess að geta hafið störf sem grunnskólakennari næstkomandi þriðjudag þann 15. ágúst...

Annars fékk ég svo svakalega martröð í fyrrinótt um að ég væri byrjuð að kenna og ég fékk svo hryllilega erfiðan umsjónarbekk og var orðin svo sveitt strax á fyrsta deginum að það lak af mér svitinn og ég þurfti að þerra efri vörina með jöfnu millibili, úff ég vona að þetta sé bara fyrir góðu:)

Hvernig er það annars eru enn einhverjir sem detta hérna inn? Nenni nefnilega ekki að byrja aftur á þessari vitleysu nema ég hafi dygga lesendur:)

Ég er í augnablikinu að kenna sextugri ömmu minni á nýju tölvuna hennar. En hún ákvað svona á "gamalsaldri" að fá sér tölvu og í kvöld er ég með hana í einkakennslu í að senda tölvupóst. Hún stendur sig alveg ótrúlega vel konan:)

Þannig að það er komin þokkaleg samkeppni við Afa Wonder, spurning hvort að amma verði farin að blogga eins og brjálæðingur í lok ársins...hver veit?

Later..