miðvikudagur, október 31, 2007

Á morgun byrja ég formlega að vinna...

Þar með líkur 8 mánaða fæðingarorlofi mínu. Mér finnst svona eiginlega eins og ég hafi byrjað í fyrradag en svona er nú tíminn endemis fljótur að líða.

Það hittir hins vegar svo skemmtilega á að akkúrat á morgun, föstudaginn og mánudaginn er vetrarfrí í skólanum þannig að ég byrja á því að fara í frí. Ekki svo slæmt það. Ég ætla reyndar að mæta á morgun og skipuleggja mig, finnst dáldið gott að koma vel skipulögð til vinnu á fyrsta vinnudegi. Núna eru 3 skipulagsbækur komnar í gagnið og gamla góða Linda er að detta í gírinn.

Ég á eftir að sakna þess að vera heima með Áru allan daginn, lúranna okkar, gönguferðanna, heimsóknanna og tjillsins að vera bara heima og dúllast eitthvað. Hún verður hins vegar í svo góðum höndum að ég hef ekki nokkrar áhyggjur af henni, fyrir utan það hvað hún er mikil pabbastelpa en ég ætla nú samt að vona að hún sakni mín eitthvað.

Ég hlakka líka til að takast á við ný verkefni í vinnunni, yfir 100 nemendur og stærðfræði alla daga.

Þetta verður bara alveg ljómandi fínt allt saman, aðeins minni svefn kannski og aðeins meiri skipulagning, það ætti nú að reddast...

Síðan eru ekki nema rúmar sex vikur þangað til ég fer síðan í jólafrí!

sunnudagur, október 28, 2007

Til heiðurs heimspekingnum brugðum við okkur á Sjávarkjallarann með tengdaforeldrum mínum. Þar duttum við í einhvern exotic pakka og brögðuðum m.a. á humri, lynghænu, krabba, laxi, hirti, túnfisk, hámeri, andabringum, áli, pistasíu creme brulé, þremur mismunandi tegundum af ís, súkkulaðimús með sprengikúlum, kaffiís og fleira og fleira og fleira. Þessu var síðan öllu skolað niður með ljúffengu hvítvíni.

Staðurinn fer algjörlega í flokk með BA verkefni fyrrnefnds heimspekings og hlýtur fyrstu einkunn.

Ég er ekki hissa á að þotuliðið taki einkaþotur til að bragða á exotic:)

Allir pakkaðir eftir - eftirrétt!
Ég (með ekki brosa svipinn minn sem er ekki að gera sig) og spekingurinn
Litli skrákurinn og mamma sín...

Á morgun: Klipp og lit + fundur í skólanum...vinnan að fara að kikka inn!


laugardagur, október 27, 2007

Þessi litli kall getur nú formlega farið að titla sig heimspeking!
Við mæðgur óskuðum honum auðvitað til hamingju með það með því að vakna snemma og færa honum gjöf í bælið...
Hann hefur þó kosið að hafa þetta allt saman í kyrrþey þar sem BA verkefninu var auðvitað skilað með glæsibrag í vor! Aðeins eitt lítið skitið verkefni var eftir sem setti punktinn yfir i-ið...
Til hamingju:)

fimmtudagur, október 25, 2007

Allt og ekkert...
Með ömmu Flóró aka ömmu glingur aka Don Ruth

Hittum köttinn Snotru í dag og Ára elskaði hann og skreið á methraða á eftir kisu litlu...nú vill AFO að dóttirin fái kött í jólagjöf...vægast sagt dræmar undirtektir móður og hún ekki alveg eins spennt;)

En eigum við að ræða það eitthvað hvað ég er með miklar harðsperrur eftir extrað sem var tekið eftir hjólatímann! Á bágt með að þurrka af borðum, klæða mig, halda á barni og já bara svona beisiklí hreyfa handleggina yfir höfuð!


Nú bý ég svo gott sem á hóteli...
...því Frónahótelið hér handan hússins er búið að kaupa allar hinar 3 íbúðirnar. Í nótt rumskaði ég við einhverja gesti sem voru að koma, líklegast af því að þeir voru á hælaskóm. Ég var þó ekki meira vakandi en það að næstu tvo tímana fór mig að dreyma að ég byggi á hóteli, var að vísu ekki alltaf í morgunmat því það var svo dýrt en einhverja hluta vegna ákvað ég að fá mér Brushettu þennan morgun. Ég var nú hálf spæld þegar ég vaknaði síðan og áttaði mig á því að ég þurfti bara að fá mér gamla góða Cheeriosið!
Ég var hins vegar rosa glöð þegar ég leit á klukkuna og hún var rúmlega sjö og litla áran mín búin að sofa í alla nótt. Hún lætur auðvitað ekkert mömmu sína vera að standa í einhverju næturbrölti svona eina á vakt heldur bíður eftir aðalnæturverðinum;)
Farin að fá mér cheerios...

miðvikudagur, október 24, 2007

Hæ...

ég skundaði í hjólatíma áðan hjá henni Ingibjörgu minni, mikið var það nú hressandi og ÁTAKANLEGT! Hef engu gleymt nema kannski pínu þoli og já armbeygjum:)

Núna er ég líka rosa þreytt í líkamanum og AFO farinn á næturvakt þannig að ég stend svefnvaktina á þessum bænum...við erum nefnilega búin að vera soldið lin og löt undanfarið, ekki nennt á fætur snemma og keypt okkur svefn með brjóstunum á mér...sem er ekki sniðugt, sér í lagi þegar maður er að fara að vinna eftir minna en tvær vikur!

Þannig að núna algjört bann á brjóst og harkan sjö. Maður þarf líklega sinn svefn þegar verður tekist á við ungdóminn í LA...

ble...

mánudagur, október 22, 2007

Góður dagur framundan...í orlofi!

Knúsa litlu áruna mína og njóta þess að vera ekki að fara að vinna fyrr en eftir tvær vikur - já einungis tvær!!!

Skreppa í nudd

Máta ný Flóródress á litlu skottu

Að ógleymdri Krónuferð um eftirmiðdaginn...

og já var ég búin að gleyma að segja njóta þess að vera í orlofi aðeins lengur

Þeir eru ljúfir þessir orlofsdagar

laugardagur, október 20, 2007

"Sætindasökker"

Ég er búin að komast að því að ég er algjör "sætindasökker"! Það er svo sem engin nýlunda, hef alla tíð verið veik fyrir sætindum. Hins vegar stjórna ég allri óhollustu í sambandi okkar AFO, því komumst við að þegar við vorum að fara yfir sælgætis - og skyndibitaát okkar síðastliðna viku. Undantekningalaust er það ég sem sting upp á einhverjum óskunda, til að mynda (við í göngutúr í bænum): L:"Vá hvað ég væri til í bæjarins núna", A: "Já það er spurning", L: "Ég meina það er ekki eins og 560 sé mikið, við getum bara haft kjötfarsið á morgun, ég frysti það bara", A: "Já ok við getum gert það".

Ok Andri er ekki sá besti til að stöðva svona þróun en hann stingur aldrei upp á neinu svona, hann sættir sig bara við hvað sem er (liggur við).

Í gærkvöldi var hann sendur út á Aðalvideoleigu til að kaupa Flipper höfrunga og smá bland, og það er ekki í fyrsta skipti sem sú staða kemur upp. Svo ég tali nú ekki um Hagamelsferðir, pizzuát, Jóamat og annað slíkt...ég veit ekki hvaðan ég hef þetta eiginlega!

Skyndilinda er því algjört réttnefni...og ég veit líka að vinkonur mínar taka undir það að þegar þær hanga með mér þá borða þær aldrei meira af pizzum og bragðaref!

En nú skal verða bót á máli!

föstudagur, október 19, 2007

Er ekki við hæfi að enda vikuna á því að setja inn smá video af duglegustu Skagadísinni...

...sem getur núna setið öllum stundum og sett kúluna ofan í!;)

Góða helgi!

miðvikudagur, október 17, 2007

Í gærmorgun kom dálítið svakalegt fyrir mig...

...ég veit samt ekki alveg hvort það er meira svakalegt eða bara drepfyndið!

Þannig var mál með vexti að Ára litla var búin að vera að vakna heldur óhress um nóttina og foreldrarnir hálf ráðþrota með hvað ætti að gera fyrir barnið, oft svo erfitt að vita hvað amar að. Síðan um fjögurleytið þegar hún hafði fengið að drekka sem er náttúrulega algjörtt bann bann hef ég greinilega rotast alveg og veit ekki fyrr ég vakna við það að ég er gjörsamlega að hrynja út úr rúminu með tilheyrandi dynk, skall með mjöðmina og höfuðið í gólfið og Andri vaknar upp við öll þessi læti. Og meiddi ég mig??? Já mjög mikið, svo mikið að ég er með kúlu á höfðinu en oft og tíðum læknar hlátur öll sár og hláturskastið sem ég fékk þarna um morguninn var ekkert lítið! Ég er síðan búin að vera að hlæja að þessu svona meira og minna síðan. Það er ekki eins og við sofum í litlu rúmi!

Góð saga...

Styttist í vinnu hjá mér, ekki nema 3 vikur þar til ég verð farin að siða þorra unglinga LA til. Og þá skipti ég enn og aftur um handrit og smelli mér í handritið....já ertu bara farin að vinna, hvernig leggst það í þig;)

Tengdasonur minn dafnar vel í Köben og er kominn með nafn: Eldur Egilsson, mætti ekki minna vera fyrir þennan flotta mann!

Vona að dagurinn verði okkur öllum góður

mánudagur, október 15, 2007

Ég lagði loksins leið mína áðan í Krónubúðina úti á Granda...

þangað sem allar heimavinnandi húsmæður í Vesturbænum flykkjast á degi hverjum!
Og vá hvað ég skil að þær flykkist þangað, ég gæti farið þarna daglega og AFO talaði um að hann hefði séð geðsýkisglampa í augunum á mér þegar ég stormaði um alla búð leitandi að einhverju sem ég vissi ekki hvað var, svo mikið var úrvalið og í þokkabót ódýrt!

Við komumst þó út svona nokkurn veginn með það sem við ætluðum að kaupa, maður dettur nefnilega soldið í þann pakka að kaupa allskyns óþarfa þegar svona mikið er í boði.

Annað gleðiefni dagsins var að ég fór niður í geymslu og náði í alla gömlu haldarana mína. Þar sem dóttir mín sýgur einungis úr mér snemma á morgnana ákvað ég að það væri kannski aðeins hugglegra að vera í einhverju öðru en gjafahöldurunum. Ég átti alveg eins von á að ég "fyrrverandi stórbrjóstakonan" (eða hitt þó heldur) myndi ekki passa í neinn af mínum gömlu þar sem eftir sitja tveir litlir tepokar sökum sogsins góða! En viti menn þeir pössuðu bara svona ljómandi vel og ég var því greinilega ekki eins brjóstgóð og í minningunni!

Ég sparaði mér því dágóðan skildinginn og get farið að leggja fyrir í sílikonaðgerðina;) Sem er pottþétt jólagjöfin í ár...djók

Góðar stundir!

sunnudagur, október 14, 2007

Kallinn klikkaði ekki frekar en fyrri daginn...

Og ég áttaði mig á því að ég gat sungið með svona öllum lögunum nema þremur!
Bendir til þess að mikið sé hlustað á Megas á heimilinu!

Föngulegur hópur á Horninu fyrir tónleika

Og nú er ég farin að leggja mig...Zzzzz

laugardagur, október 13, 2007




Ég hef bara ekki tekið augun af litla tengdasyninum og er alltaf að skoða myndir af honum:)


Haldiði að þau verði ekki fallegasta parið í heiminum???

Í dag erum við að fara í barnaafmæli og í kvöld munu foreldrarnir bregða undir sig betri fætinum og fara út að borða og á tónleikana með Megasi. Við hlökkum mjög mikið til...að ná í betri fótinn!

Góða helgi elskur:)

fimmtudagur, október 11, 2007

Getraun...hver er á myndinni??? (Bannað að giska þið sem vitið!)

Kíkið á höfuðlagið og eyrun skuggalega líkt einhverjum!!!!

þriðjudagur, október 09, 2007

Ég er svo hamingjusöm fyrir hönd hennar Álu litlu og Egils Spegils...

...en tengdasonur minn fæddist áðan á Hvidorve spítala í Kaupmannahöfn. Stór og stæðilegur, 55 cm og 4330 gr. Ji ég er svo glöð.......lífið gerist ekki betra en þetta:)

Til hamingju elsku litla fjölskylda!
Er það ekki týpískt...

...við náðum í dýnu, Andri setti ég sig í stellingar og ég sá fram á að hlusta á org úr hinu herberginu, því jú eins og ég nefndi í gær ætluðum við að finna "fyrir Köben" tempóið með barninu okkar!! Hvað gerist þá??? Barnið sefur betur en nokkru sinni og vaknaði ekki á ókristilegum tíma til að fara á fætur, þau eru svo óútreiknanleg þessi skinn. Nú er bara að copy/paste daginn í gær og sjá hvort að það virki aftur:) Það var síðan minn dagur í að sofa lengur og ég var að skríða fram úr upp úr hálf ellefu eða þegar skottan var að koma úr vagninum. Líður mér betur, ójá, var búin að gleyma hvað er gott að vera út úthvíld!
Góðar stundir

mánudagur, október 08, 2007

Takk fyrir mig kæra fjölskylda og vinkonur:)

Afmælisdagurinn lukkaðist alveg ljómandi vel og ég fékk fullt fullt af flottum gjöfum:) Ég hætti ekkert að vera afmælisstelpa þó ég sé orðin móðir. Það er líka nokkuð ljóst að vinkonur mínar óska eftir mér sterkri til leiks í rauðvínsdrykkjuna því ég fékk hvorki meira né minna en fimm flöskur!

Mojito bollan rann ljúflega niður og ostarnir og sætu pinnarnir klikkuðu ekki:)

Góður og skemmtilegur dagur og ÁRA sendir ömmu sinni á Flórída kveðjur og knús. Hún var vesenispési í nótt og lét foreldra sína heyra það. Nú verður pabbinn aftur settur á dýnu inn til hennar og gamla "fyrir Köben" tempóið fundið aftur. Stelpurófan er ekki enn búin að jafna sig á tímamismuninum!
Ég setti inn nokkrar myndir frá afmælinu inn á www.123.is/agustarut. Ekki feimin að biðja um leyniorðið

föstudagur, október 05, 2007

Alþjóðadagur kennara í dag!

Spurning um að Ríkisstjórnin ætti að gefa því smá gaum og um leið skoða hvað þeir ætli að gera í því að ég fái 161.000 kr. útborgað fyrir 100% vinnu!

Í augnablikinu vantar 49 starfsmenn í skólana þannig að skólastjórar telji sig vera með fullmannað.

Með þessu áframhaldi er skólastarf á Íslandi á hraðri niðurleið.

Og ég minni kennaravini mína á að þeir geta fengið álagsgreiðslur sbr. gr. 1.3.2 fyrir m.a:

  • skerta stoðþjónustu, eða ef hún fór seint af stað eða er ekki fyrir hendi
  • kennarar eru að kenna í mörgum árgöngum/bekkjum margar námsgreinar
  • ef tveir eða fleiri kennarar eru sameiginlega með umsjón árgangs = aukið samstarf
  • erfiða bekki/nemendur ef þeir eru í samstarfi við leiðbeinendur
  • ef þeir eru í samstarfi við kennara sem fer t.d. alltaf á hádegi, vegna þess að hann er að fara í hina vinnuna sína og réð sig upp á að þurfa ekki að sinna annarri viðveru.
  • ef kennarar vinna mikla yfirvinnu sem þeir tóku að sér til að redda málum

Þessar upplýsingar eru fengnar frá formanni Kennarafélags Reykjavíkur.

Vona að þið eigið góðar stundir um helgina

mánudagur, október 01, 2007

Það sem ein diskókúla getur framkallað....

ÁRA tók upp á því að skríða þegar hún var í pössun hjá ömmu sinni í dag á meðan móðir hennar reyndi að sofa flensuna úr sér! Hún gefst greinilega ekki upp ef hún ætlar sér eitthvað.

Myndasmiðurinn var með vélina á ská þannig að þið þurfið bara að halla aðeins undir flatt eða snúa tölvunni!

Annars er það helst að frétta af flensunni að hún vill ekki burt en lætur sig vonandi hverfa í nótt!

Farðu burt ljóta flensa og beinverkir...arrrrrg